إزاي تعملي عزومة ناجحة في رمضان؟.. نصائح وحيل من تجارب الستات

العزومات في رمضان، أصبحت شيئًا أساسيًا كل عام، سواء للأهل والأقارب أو للأصدقاء، ولكن لها أهمية خاصة مع لمة العائلة وسعادتهم بالأكل الذي أعددتيه، ويبدأ التجهيز للعزومة الرمضانية المنتظرة قبل حدوثها بأسابيع أو عدة أيام على الأقل، وتؤدي إلى حالة من التوتر وكثرة التفكير في كيفية تنظيم عزومة رمضانية مشرّفة يخرج منها الصيوف سعداء، ولذلك فقد سألنا الستات عن أهم تحضيراتهم لإعداد وليمة ناجحة في رمضان.

تحديد ميزانية للعزومة
تقول "سامية"، إن "العزومات تحتاج لترتيب مسبق، وخصوصًا مع ضيق الوقت في رمضان، وعشان أقدر أعمل عزومة في البيت وتكون ناجحة، أول حاجة بعملها أني بحدد ميزانية للعزومة عشان الأمور متوسعش مني وتبوّظ ميزانية شهر رمضان كله،
وعلى أساس الميزانية بحدد أصناف الأكل اللي هاعملها، بيكون في صنف رئيسي زي الفراخ واللحمة والبط، وطبق رئيسي تاني"، وهناك بعض الوجبات المهمة التي تقدمها "سامية" لأنها موفرة وسهلة وتنجز أي عزومة مثل؛ شاورما الفراخ أو فتة الشاورما بالفراخ أو اللحمة، فهي سهلة ويحبها أغلب الضيوف.

التحضير المسبق
وتُفضل "سامية" أن يتم التجهيز للعزومة قبلها بعدة أيام، حيث قالت: "أنا بجهز للعزومة قبلها بيوم أو اتنين ده بيريحني جدًا، وبيقلل التوتر أو أني أنسي أي شيء مهم، عشان كده بغسل الخضار وبشيله في أكياس في التلاجة، وأجهز الأكل بحيث يكون جاهز للتسوية، وكذالك العصاير بحضرها وأشيلها في التلاجة، وكمان الحلويات، فبحضر شربات الكنافة والكريمات وغيرها قبلها بيوم أو يومين بردو".

جهزي منيو العزومة

أما "جيهان" فتفضل كتابة قائمة بالمأكولات ومشروبات العزومة، وتقول: "من الأمور التي تسهل عمل عزومة ناجحة هي التجهيز للأكلات اللي بيحبها الضيوف واستبعاد الأكلات اللي مش هاتتاكل، وبحاول أخلي الأصناف متنوعة عشان تلائم مع كل الأذواق وكمان الشوربة السلطات والمقبلات براعيها وانا بحضر للعزومة".

وأكلمت "جيهان": وأنا نازلة السوق بكتب كل مكونات العزومة بدقة وبشتريها قبل العزومة بوقت كافي وبراعي عدد الضيوف مش بعمل أكل زيادة، وكما بحضر السفرة بزينة رمضان وبرتب البيت الصبح مع أولادي"، مضيفة: "أما عن تجهيزات المنزل فمن الأفضل أشارك أفراد العائلة.. أنا بخلي أولادي وزوجي في ترتيب البيت معايا، قبل وبعد العزومة، ده بيخلي الأمر أسهل".

بط مشوي

عزومات رمضانية