سألنا الستات عن أشهر العادات قبل رمضان.. والمفاجأة في «قلب الشقة» وحيرة «الأكل»

أيام قليلة ونستقبل شهر رمضان المعظم، شهر الرحمة والبركات، وكمان شهر الولائم والعزومات، ولهذا تتأهب منازل المحروسة، وتفرض الأسرة إجراءات حازمة لاستقبال الشهر الفضيل، ويقع الدور الأكبر في تلك الملحمة -التى تبدأ من الأن- على النساء والأمهات التي يختلف استقبالهن لشهر رمضان على باقي أفراد الأسرة، فتستقبله ربة المنزل بتجهيزات المنزل وتقلبه رأسًا على عقب، وتحرص على تخزين الطعام وشراء مستلزمات البيت، وسرعان ما ينقلب البيت كله استعدادًا لاستقبال رمضان،  Food Today سألت الستات بيعملوا ايه قبل رمضان؟!.

فاطيمة: بنبطل نطبخ ونبدأ حملة تنظيف

تنظيف المنزل أهم اولويات المرأة قبل أيام من رمضان

 

تقول فاطيمة -ربة منزل- أحنا متعودين من صغرنا تجهيز الشقة قبل رمضان بشهر، بنضف كل ركن فى البيت حتى الأدراج وبين ثنايا الأثاث، أما التلاجة فله شغل تاني،  أحنا بنرجعها جديدة تاني عشان تستقبل طعام رمضان على نضافة، وبعد أن نتخذ قرار أننا بنبطل نطبخ عشان نفضي التلاجة وبنقضيها جبنة وبطاطس وأكلات سريعة".

أغلب النساء أجمعوا على نفس الطقوس تقريبا، تنظيف المنزل وشراء متطلبات الثلاجة من مواد غذائية من السوق، لكن سارا تستقبل الشهر بطفوس مختلفة بعض الشيء، فتقول: " أتعودنا يدخل علينا رمضان كل سنة بشكل جديد، احنا بنغير ديكورات البيت كل سنة في نفس الميعاد وتحديداً قبل رمضان بأسبوع، مرة تشيل السفرة ونجيب غيرها، ومرة تانية نغير ألوان البيت، ومرة تانية نكتفي أننا نغير ترتيب البيت، والطقوس دى أهم لنا من تنضيف البيت، أو تخزين الطعام.

بثينة: بعمل كل أكل رمضان فى البيت صنع 

تحضير الأكلات الخاصة برمضان من أهم طقوس ست البيت

 

أما بثينة فتبدأ بتخزين الحليب لصنع الزبادي والسمنة فى المنزل، وتقول: اتعودت مهما اشتريت سمنة بلدي وزبادي، أني أعمله في البيت مش بحس أن رمضان قرب إلا لما أدمس الفول وأعمل عجينة طعمية، واعمل عيش وزبادي وسمنة بأيدى فى البيت".

"ليلى" حالة نادرة: مش بعمل حاجة

وهناك أخريات لا يقمون باي شيء مختلف لاستقبال شهر رمضان، فتقول ليلي مستنكرة:"أنا بستغرب ليه الناس بستقبل رمضان بتنظيف الشقة!، بشكل متكلف ومبالغ فيه، ده غير إعداد الولائم كل يوم طول أيام شهر رمضان، أنا بعتبر ده تعب على  الفاضي، ويعيدون نفس الشئ أخر رمضان، ده غير تجهيزات الأكل وشراء الطلبات".

وترى ليلى أنه من الأفضل استقبال بصحة جيدة بدلا من تمزق في الأربطة ونقضي العيد نايمين في السرير بسبب الجهد الزائد المبذول فى رمضان.