ماهي مقادير عمل المكرونة بالجمبري
المقادير اللازمة للتحضير
- ربع كجم من الجمبري متقشر ومتنضف كويس.
- مكرونة يفضل شرائط أو إسباغتى
- معلقتين كبار بقدونس مفروم
- أربع فصوص ثوم متقطعين قطع صغيرة جدا
- معلقة صغيرة بابريكا
- فلفل وكمون وملح
- مكعب مرق خضروات
- معلقة كبيرة صلصة طماطم
- ربع كجم طماطم شيرى مقطعة إلى أنصاف
- (إختيارى) معلقتين كبار خل
ماهي طريقة تحضير المكرونة بالجمبري
◾فى طاسة سخنة على النار هنضيف ثلاث معالق كبيرة زيت وننزل عليهم بالثوم المفروم
اول ما ريحته تطلع ننزل علية بالطماطم ونقلبهم كويس
(لو مافيش بننزل بمعلقة الصلصة فقط) أربع دقائق ننزل بمعلقة بقدونس واحده ونقلبها مع الطماطم
◾بعدها هنقسم الطاسة لنصين وننزل بالجمبري لوحدوا فى نص منهم لمدة ٣ دقايق على كل جنب لغاية ماياخد لون ذهبي جميل
هنزل عليه بمعلقة كبيرة من الصلصة ومعلقة صغيرة من البابريكا ونص معلقة صغيرة من الفلفل الأسود وربع معلقة صغيرة من الكمون ومكعب مرق خضروات وملح حسب الرغبة ونقلب كل مكونات الطاسة سوى لمدة خمس دقايق ، وبعدين نضيف الخل ونقلبه معاهم لغاية ماريحتة تطلع
◾فى حلة تانى هنكون سلقنا المكرونة ثلاثة إربع سوى ننشلها من المية وننزلها على باقي المكونات فى الطاسة ومعاها نص كوباية من مية السلق بتاعة المكرونة تكمل باقى سواها مع الخليط وتتشرب من طعمه ولونه لمدة خمس ل سبع دقايق على نار متوسطة
اخر حاجه بنضيفها معلقة البقدونس الأخيرة وبنقلبها وخلاص كده.
